چین کے ریلوے سٹیشن پر دھماکا، 3 افراد ہلاک ،79 زخمی

چین کے مغربی سنکیانگ علاقے میں ریلوے سٹیشن پر دھماکے میں تین افراد ہلاک اور 79 زخمی ہوئے ہیں۔

 اورمچی کے جنوبی ریلوے سٹیشن پر ہونے والے اس دھماکے کے بارے میں حکام کا کہنا ہے کہ صورتحال کنٹرول میں ہے۔ پچھلے کچھ عرصے سے سنکیانگ میں کئی پرتشدد کارروائیاں ہو چکی ہیں۔ سنکیانگ میں مقامی حکومت کی نیوز پورٹل پر دی گئی معلومات میں کہا گیا ہے کہ 30 اپریل کی شام



تقریباً 7.10 بجے مسافروں کے باہر نکلنے کے راستے پر دھماکا اس وقت ہوا جب ٹرینوں کی آمد ہوئی۔ عینی شاہدین نے سرکاری خبر رساں ایجنسی کو بتایا کہ دھماکا شاید اس سامان کے پاس ہوا جو سٹیشن اور بس سٹاپ کے راستے کے درمیان میں چھوڑا گیا تھا۔ سوشل میڈیا پر بھی اس دھماکے کی کچھ تصاویر آئی ہیں جن کی آزادانہ طور پر تصدیق نہیں ہو پائی ہے۔ ان تصاویر میں دھماکے کے بعد سوٹ کیس اور ملبہ پھیلا ہوا تھا۔